أبل بتعمل عظمه
انهاردة أبل كالعادة خرجت بالجديد في أنظمة أجهزتها وهم
iOS 15
iPadOS 15
macOS Monterey
watchIOS 8
tvOS 15
بص انا بصراحة أكتر حاجة اهتميت بيها هي iOS 15 وiPadOS 15 وحاجة واحدة بس من maOS Monterey لاني بحب أعرف جديد أول اتنين، بس مش بهتم أوي بالماك..
ندخل في المهم..
مزايا iOS 15
مبدئيا كدا بسم الله الرحمن الرحيم
أبل نزلت فيس تايم للأندرويد والويندوز من خلال موقع ويب
و90% من المزايا الجديدة في فيس تايم متاخدة من Zoom وسكايب وأشباههم
فيه ميزة جديدة اسمها Shared with You في أبلكيشن الSMS بتاع
أبل اللي هو Apple Messages
ودي لما يجيلك في مسدجات SMS لينكات أخبار أو صور أو مزيكا
كل أبلكيشن بيشغل نوع من المحتوى ده، هيتعمل جواها سيكشن
اسمه Shared with You يترتب فيه اللي جالك
يعني مثلا في أبلكيشن Photos هتترتب أوتوماتيك الصور اللي بتجيلك في مسدجات SMS، ولما تروح فوتوز وتشوف صورة من الصور دي في تبويب Shared with You هتقدر منها تروح مباشرة على المسدج اللي استقبلت فيها الصورة دي
نيجي بقى للنوتفكيشنز
واللي بصراحة أبل أبدعت المرة في تحديثها
أولا فيه ميزة اسمها Focus
ودي بتقدر تخليك تختار ازاي وامتى موبايلك ينبهك للنوتفكيشنز
خلال ما بتكون بتعمل حاجة معينة زي انك نايم أو بتسوق مثلا
تاني ميزة هنا هي Notifications Summary
دي بقى ياسيدي بتخليك تختار وقت معين في اليوم يجيلك فيه
النوتفكيشنز اللي جتلك بشكل مرتب، بحيث الأبلكيشنز اللي تهمك في الأول وبعدها الأقل أهمية وهكذا، وكل ده بيشتغل من خلال نظام ذكاء اصطناعي بيحلل ويفهم استخدامك لموبايلك كويس قبل ما يعمل القصة دي
تالت جزئية بقى هي ان أبل دمجت وضع منع الازعاج Do Not Disturb جوا أبلكيشن الشات iMessage، فلما حد يجي يبعتلك وانت مفعل الوضع، بيظهرله ان انت مش عايز حد يزعجك، وبالتالي مش هيوصلك ولا هترد 😊
فيه كمان برضو ميزة Live Text
ودي انك تقدر تتفاعل مع أي نص تيكست جوا الصور
سواء مكتوب بخط الإيد أو ديجيتال
تعمله كوبي بيست، تحوله من خط يد لديجيتال وتبعته في ايميل
تخزنه في فايل وورد، لو رقم تليفون تعمل مكالمة مباشرة
وبالمناسبة ده بتعمله جوا أبلكيشن الفوتوز العادي مش محتاج
أي أبلكيشن مخصوص
إصدار iPadOS 15
طبعا فكرة ان أبل تعتبر ترتيب الويدجيتس بحرية على شاشة الايباد
دي ميزة جديدة وانبهار وكدا انا مش هعلق عليها خالص، لان ده سفه
بس الميزة اللي عجبتني فعلا جدا هي ميزة الـ Quick Note
واللي بتخليك تقدر وانت في اي مكان على الآيباد تقدر تكتب ملاحظة
بس مش دي الميزة خالص
الميزة هي ان الملاحظة دي بتفضل متخزنة في مكانها، زي
الـ Stickey Note، فأنت لو لفيت لفتك وقفلت الجهاز، وعدى يومين تلاتة، ورجعت تاني هتلاقيها في نفس المكان اللي كتبتها فيه سواء أبلكيشن أو موقع ويب أو أي مكان!
برضو فكرة انك تقدر تعمل سيرش في النوتس بكلمة مفتاحية Tags وتعمل براوزر للتاجز دي Tags Browser، ده غير انه فيه فولدرات ذكية قايمة على التاجز تقدر ترتب فيها النوتس، دي حاجة عظمة جدا!
والأحلى انك تقدر تعمل نوتس Shared مع حد تاني أونلاين، فتقدروا انتوا الاتنين تكتبوا فيها وتعدلوا وتعملوا منشن لبعض وكمان فيه مكان مخصوص Activity تقدروا تشوفوا مين عدل ايه أو مسح أو ضاف ايه فين!
نيجي لآخر نقطة وهي الخاصة بـ macOS Monterey وiPadOS 15
أبل عملت حاجة اسمها Universal Control
واللي بتخليك تقدر تستخدم ماوس واحدة وكيبورد واحد و تاتش باد واحدة على الآيباد والماك بوك والماك!!!
يعني انت تقدر تنقل فايل واحد ما بين شاشات التلات أجهزة من خلال ماوس واحدة 😮
اتفرج: https://bit.ly/2RuHq7W
0 تعليقات
أخي الزائر قبل التعليق تذكر قول الله تعالي " مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ " فأي تعليق مسئ لصاحبه وليس لكاتب المحتوي .
Emoji