من شوية جروب الهاكرز المعروف Anonymous نشروا فيديو بيتكلم عن إيلون ماسك وتلاعبه بسوق العملات الرقمية وتحديدا البتكوين.

الفيديو كان مهين لأقصى حد بعد ما وصفوا ماسك بالبليونير النرجسي اللي بيعاني من عقد نفسية زي الحاجة الماسّة للاهتمام (اتنشن يعني)، وإن تلاعبه بالسوق ده سبب خسائر لأشخاص عاديين بيحلموا بتحسين حياتهم عبر استثمارهم في العملات الرقمية في ظل كفاحهم ومعاناتهم؛ وده شيء ميعرفوش واحد زيك اتولد في ثروة مسروقة من مناجم الزمرد في جنوب إفريقيا.
الفيديو اتكلم بردو كنوع من الإهانة إن ماسك مش مؤسس شركة تيسلا ولكن اشتراها من مؤسسيها اللي هما أذكى منه، ده غير إن استثمار شركته في البتكوين حقق ليه أرباح أكتر من الأرباح اللي حققتها الشركة من بيع السيارات الكهربائية لسنوات.
الفيديو لم يكتفي بإهانة ماسك بل بالتذكير ببعض جرائمه زي ظروف العمل اللا إنسانية اللي بيعاني منها معظم الموظفين في شركاته، ده غير استغلاله للأطفال للعمل في مناجم الليثيوم في إفريقيا وعدم اهتمامه بالتلوث البيئي اللي بتسببه المناجم على السكان المحليين، بل وانفتاحه لدعم انقلابات وتعيين دكتاتورين لاستكمال العمل في المناجم.
الفيديو اتكلم عن علاقة مشبوهة بين ماسك والحكومة الأمريكية ومحاولته لإنشاء مجلس تعدين البتكوين يضم أكبر جهات تعدين البتكوين (للسيطرة على العملة والقضاء على أهم مبادئها وهو اللا مركزية).
المتحدث ختم الفيديو بالجملة دي:
"You may think you are the smartest person in the room, but now you have met your match. We are Anonymous! We are legion. Expect us"