موبايلات هواوي في خطر
في شهر مايو 2019 صدر الأمر التنفيذي الأمريكي بحظر تعاون الشركات مع هواوي، وده أدى بشكل رئيسي لخسارة موبايلات هواوي لخدمات جوجل على موبايلاتها.
من وقت القرار حصل استثناء للموبايلات اللي نزلت السوق قبل القرار وكان في رخصة مدتها 3 شهور بتسمح لجوجل بإرسال التحديثات الأمنية وتحديثات النظام والتطبيقات للموبايلات دي، والرخصة كانت لما بتنتهي بتتجدد تاني.
اللي حصل بقى إن الرخصة الحالية انتهت من 3 أيام ولم يتم تجديدها.
ده معناه إيه فيما يخص الموبايلات 
حسب ما قرأت في الواشنطن بوست وأندرويد سنترال إن موبايلات هواوي اللي نزلت قبل أو بعد القرار (واللي بتستخدم إصدار الأندرويد الخاص بجوجل) مش هتستقبل أي تحديثات تاني لا أمنية ولا تحديثات للنظام ولا للتطبيقات.
هل ممكن يتم تجديد الرخصة
ممكن أيوة، لكن حسب الحالة العامة شايف إن ده مستبعد. أمريكا بتحاصر هواوي، وقفت عنها إمدادات المعالجات بتاعتها ومش هتقدر تصنع معالجات كيرين تاني، والخطوة التالية هي ضرب السوفتوير بشكل كامل.
بالإضافة إلى الاتجاه العام لضرب الشركات الصينية، زي وقف التعاملات المالية مع تيك توك، وي شات، والتفكير دلوقتي في حظر شركة علي بابا.
الشركة حاليا في أزمة..
هتحتاج إنها تستخدم معالجات مختلفة لموبايلاتها. موبايلاتها القديمة مش هتقدر تستقبل على الأقل التحديثات الأمنية وده بيضع أجهزة هواوي في خطر وبيجعلها عرضة للاختراق. موبايلاتها الجديدة هستخدم نسخة أندرويد خام أو هتستخدم نظام "هونج منج" أو Harmony زي ما بيقولوا ودي مشكلة برضه لأنه يشبه كتير نظام ويندوز فون اللي كان نظام كويس لكن دعمه ضعيف والتطبيقات الموجودة عليه قليلة جدا وكان مصيره في النهاية الفشل.
0 تعليقات
أخي الزائر قبل التعليق تذكر قول الله تعالي " مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ " فأي تعليق مسئ لصاحبه وليس لكاتب المحتوي .
Emoji