المدير التنفيذي لتويتر "جاك دورسي" و تقنيه "NFT" | تكنو سيكيوريتي

 المدير التنفيذي لتويتر "جاك دورسي" من فترة عرض أول تويتة تم نشرها على الموقع للبيع.. والمزايدات وصلتها لسعر 2.5 مليون دولار.. وكان السؤال الأكثر تكرارا ازاي واحد يقدر يشتري تويتة

فيه فيديو الأسبوع اللي فات مدته 41 ثانية تقدر تشوفه عالنت بسهولة اتباع مقابل 6.6 مليون دولار!

مرحبا بكم في ثورة جديدة في العالم الرقمي والبيع عبر الإنترنت من خلال تقنية NFT

يطلع إيه البتاع ده

كلمة NFT هي اختصار لمصطلح Non-Fungible Token أو الرمز المميز الغير قابل للاستبدال.

التقنية دي ببساطة بتعتمد على تقنية سلسلة الكتل Blockchain لإنشاء نسخة رقمية غير قابلة للتزوير بتوثق امتلاك شخص معين لشيء معين، بحيث يكون الشخص ده مع شيء موثوق 100% إنه المالك الحقيقي للشيء ده.

طيب ما احنا ممكن نعمل طلعة على البلوك تشين ده وننقل الملكية دي لشخص تاني

مينفعش.. من الحاجات العظيمة في تقنية البلوك تشين إنها بتقوم على مبدأ اللامركزية.

لو خدنا مثال على البتكوين.. عندنا الأستاذ سيد كبدة حول 10 بتكوين للأستاذ رفعت كلاوي.. بتبدأ شبكة العملة إنه تبث المعاملة دي للأعضاء "المعدنين" عشان يتحققوا من صحة المعاملة عبر محاولة حل مجموعة من المعادلات الرياضية المعقدة جدا باستخدام أجهزة التعدين بتاعتهم.. وفور التأكد من صحة المعاملة بيتم توثيق المعاملة دي ومعاملات أخرى في كتلة "بلوك" وبيتم ربط البلوك ده في البلوك اللي قبله والبلوك اللي بعده. سلسلة البلوكات دي عبارة عن سجل بيضم كل المعاملات اللي حصلت من بداية تاريخ العملة.. السجل ده بيُسمى لدى رواد كلية التجارة باسم "دفتر الأستاذ".. أي شخص بينضم لشبكة البلوك تشين بيكون معاه نسخة من السجل ده.. هنا لو عايزين نزور المعاملة اللي تمت بين أستاذ سيد كبدة والأستاذ رفعت كلاوي هنحتاج نزور المعاملة عند 51% من عدد الأشخاص اللي معاهم السجل عشان بكدة يكون معانا الأغلبية اللي نقدر من خلالها نعدل على السجل.. يعني لو في 100 ألف شخص معاهم السجل لازم نخترق 51 ألف شخص عشان نقدر نزور فيه !

مش بس كدة.. أي تغيير لو نقطة حتى في بلوك معين.. بيغير هاش البلوك وده معناه كشف عملية التزوير بسهولة لأن قيمة هاش البلوك ثابتة وبيتم تسجيلها في البلوك السابق والبلوك اللاحق.

نفس العملية تقريبا بتتم من خلال تقنية NFT. أي ممتلكات بيتم توثيقها باستخدام NFT يستحيل يتم تزويرها.. وبالتالي انت تقدر تدفع 2.5 مليون دولار وتشتري رمز مميز مسجل في دفتر الأستاذ الخاص بسلسلة الكتل، بيثبت ملكيتك بشكل كامل لشيء معين سواء مادي أو غير مادي، بشرط طبعا إنك تكون شاري من المالك الأصلي.

تقنية NFT موجودة من فترة.. لكنها انتعشت لأسباب انتشار فيروس كورونا اللي حرم كتير من المجانين اللي بيدفعوا فلوس عشان يشتروا أي هبل في الجبل من ممارسة هوايتهم المفضلة بشكل طبيعي.. ونتيجة لهوسهم ده قرروا يستمروا في شراء التفاهات بملايين عبر الإنترنت.

ودي كانت قصة الـNon-Fungible Token وتصبحوا على خير.

الصورة اللي في المقاله دي اتباعت النهاردة باستخدام تقنية NFT مقابل 69 مليون دولار.