تعرف علي الفرق بين تطبيق تيليجرام وسيجنال وليه دايما بانصح بتيليجرم أكتر من سيجنال | تكنو سيكيوريتي

 بسم الله الرحمن الرحيم

هتكلم في المقاله دي عن الفرق بين تطبيق تيليجرام وسيجنال وليه دايما بانصح بتيليجرم أكتر من سيجنال.

إيه الأفضل من ناحية الأمان سيجنال أم تيليجرام

-تقنيًا- من ناحية الأمان سيجنال أفضل من تيليجرام

لأنه بيطلب صلاحيات أقل على موبايلك

مش بيخزن الشات على سيرفرات خارجية ولكن بيتم تخزينها على موبايلك

جميع الرسائل على التطبيق بيتم تشفيرها End-to-End.. ده معناه طرفين المحادثة فقط هما اللي يقدروا يطلعوا على محتوى الرسالة

طيب ليه بقى بتنصح دايما بتيليجرام أكتر من سيجنال

مبدئيا كدة سيجنال يعتبر تطبيق أمريكي.. وأنا مش عاجبني إن كل حاجة بنستخدمها تبقى تحت سيطرة دولة واحدة. تخيل مثلا صحينا الصبح لقينا أمريكا دي كلها العو هنعمل إيه ساعتها؟

ثانيا أن لو عايز الناس تنتقل من حاجة معدومة الخصوصية زي التطبيق الاخضر ورشحت لهم سيجنال يبقى أنا بضحك على نفسي.. لأنك لو فتحت سيجنال هتلاقي صحرا حرفيا.. وفنفس ذات اللحظة هتروح تحدث حالتك على الاخضر وتكتب "الكل باع والحب ضاع".

على العكس تيليجرام هتلاقي في أصدقاء كتير من بتوع الشقط والمسلسلات المسروقة من أيام رمضان وهكذا.. فهتتعامل يعني، ده غير إن تيليجرام مليان حبشتكنات زي القنوات والمجموعات والبوتس وبيدعم نقل ملفات بأحجام كبيرة ومميزات تانية كتير تخليه مش بس مجرد تطبيق مراسلة.. بل موقع تواصل اجتماعي متكامل.

ثالثا تيليجرام بيوفر نفس ميزة سيجنال الخاصة بتشفير End-to-End وعشان تستخدمها هتضغط على بروفايل صديقك وتختار بدء محادثة سرية.. وبكدة انت ضربت عصفورين ببلحة.

ليه تيلجرام مش بيدعم تشفير End-to-End في المحادثات العادية

كلمة السر هي "النسخ الاحتياطي". لو شوفنا التطبيق الاخضر هنلاقي إنه فعلا بيدعم تشفير End-to-End في المحادثات العادية، لكن عشان تعمل نسخة احتياطية من رسايلك هتتخزن بشكل نصي عادي جدا بدون تشفير عشان يقدر التطبيق يعملها استعادة لو فقدت الشات وحبيت ترجعه تاني.. ويبقى كإنك يا ابو زيد ما غزيت.

لو شوفنا سيجنال هنلاقيه الشات فيه مش بيتخزن أصلا غير على الموبايل.. طيب فرضنا الموبايل ده ضاع، اتسرق، خدته العصفورة.. انسى انك تقدر توصل للشات تاني.. إلا لو عامل نسخ احتياطي من الشات وده بيتم بشكل يدوي وبيحتاج كلمة سر وليلة كبيرة سعاتك.. ده غير إنها حاجة مملة إنك كل شوية تنقل الشات بتاعك يدويا برة الموبايل عشان تحتفظ بيه.

تيليجرام بقى عمل حاجة أحسن من الاتنين -من وجهة نظري-

قالك احنا هنعمل Server-Client Encryption / Client-Server Encryption أو تشفير من السيرفر للعميل ومن العميل للسيرفر.. يعني لما تبعت رسالة عادية من التيليجرام التطبيق هيشفرها وبعدين يخزنها على السيرفر بتاعه ويبعتها للطرف التاني.

إيه المميز في كدة؟

المميز إن الشات بتاعك بيتعمله نسخ احتياطي بشكل تلقائي + إنك تقدر توصل للشات من أي عدد من الأجهزة بسهولة مش لازم زي الواتس مثلا تدخل بالرقم، ولكن مع تيليجرام تقدر تستخدم حسابك في نفس الوقت من عدة أجهزة وأي حرف بتكتبه من جهاز بيتعمله مزامنة وبيظهر على باقي الأجهزة في نفس اللحظة.. وحتى لو جهازك ضاع، اتسرق، اتحرق الشات بتاعك هيفضل محفوظ.. وعشان كدة مينفعش يتم استخدام تشفير End-to-End في المحادثات العادية لأنها مش حاجة عملية إن التشفير ده يتفك لما تحب تعمل استرداد للرسائل من النسخ الاحتياطي.

الشات بتاعي لما بيتحفظ على سيرفرات تيليجرام بيكون مشفر

من حوالي 5 سنين حصلت خناقة على تويتر على النقطة دي وكان من ضمن اللي شاركوا فيها مؤسسي سيجنال ومؤسس تيليجرام وإدوارد سنودن وليلة كبيرة سعاتك.. طبعا كلهم كانوا بيقولوا إن الشات اللي بيتخزن على السيرفرات بيكون Plain Text أو بيتخزن بشكل نصي بدون تشفير.. مؤسس تيليجرام قال إن الشات بيتخزن بشكل مشفر وإن لو المستخدم مسح الشات بنفسه بيتم حذفه بشكل نهائي من السيرفرات، وكلا الطرفين مقدمش أي إثبات على كلامه.. لكن جميع الشواهد بتأيد كلام مؤسس تيليجرام لعدة أسباب:

أولا مفيش حاجة حصلت من تاريخ إنشاء التطبيق حتى الآن بتثبت عكس كلامه

برده مفيش أي حادثة حصلت وعرفنا فيها إن شخص 1 قدر يوصل للشات بتاع شخص 2 من سيرفرات التطبيق

تيليجرام هو تطبيق المحادثة الأكثر تعرضا للحظر في دول كتير زي روسيا وإيران وغيرها

من 2014 في جايزة 300 ألف دولار لأي شخص يقدر يكسر تشفير "المحادثات السرية" في التطبيق وحتى الآن مفيش حد قدر يكسره

تيليجرام هو التطبيق الأكتر شهرة في عالم الجريمة وأحد أهم المصادر المستخدمة في بيع المسروقات على النت (ده دليل على الأمان يا برو )

في النهاية لو انت موسوس برده وعايز تريح دماغك استخدم المحادثة السرية ودي تشفيرها End-to-End والرسائل بتتخزن فقط على موبايلك.. وفي نفس الوقت تقدر تستمتع بباقي مميزات التطبيق.

بس يا مؤمنين.. دي كانت قصة تيليجرام وسيجنال.. ونعتذر عن الإطالة